Alkizako Udalak eta herriko eragileek martxan jarri dute Sormenaren Kabia Bekaren zazpigarren edizioa. Ekainaren 1etik uztailaren 1era proiektuak aurkezteko aukera izango da.
Alkizako Udalak, herriko eragileekin elkarlanean, artistek, hausnartu, sortu eta lan egiteko proiektu bat sortu zuen 2018n: Sormenaren Kabia beka. Egitasmo horrekin lortu nahi dute Alkiza landa-eremuko sorgune moduan erreferente izatea eta arte-sorkuntza hirietatik deszentralizatzea.
Deialdian parte hartu dezakete edozein disziplinetako artistek: arte plastiko eta bisualak, arte eszenikoak, dantza, arkitektura, musika, literatura eta zinema. Sormenaren Kabia beka adinez nagusia den edozein sortzailerentzako irekita dago.
Aurreko ekitaldien moduan, bi beka emango dira. Mila euroko diru-saria jasoko du hautako proiektu bakoitzak eta hiru astez Alkizan hausnartu eta sortzeko aukera izango dute Lete Apartamentuetan.
Beka lortzen duten artistek, bestalde, Ur mara museoko Elena Cajaraville artista bitxigilearen eta Koldobika Jauregi eskultorearen bidelaguntza izango dute. Gainera, Unai Sorarrain bideogile alkizarrak beka eskuratzen duen proiektu bakoitzeko ikus-entzunezko bana egingo du neurrira.
Antolakuntzak urtero epaimahai bat osatzen du beren-beregi. Aurten, Jauregi eskultorearen alboan izango dira Idoia Zabaleta, Azala sorkuntza espazioko zuzendari artistikoa eta Miriam Loidi, 2023ko Sormenaren Kabia beka irabazi zuten artistetako bat. Antolakuntzak epaimahaiaren erabakiaren berri emango du uztaila amaitu aurretik eta aurtengo ekitaldiaren emaitzak jendaurrean aurkeztuko dira abenduan.
Sormenaren Kabia bekaren antolatzaileek azpimarratu nahi dute deialdia sormena eta natura maite duten artista guztientzat irekita dagoela, eskarmentu handiko artistek zein hasiberriek, denek dutela tokia. Hortaz, Alkizako Sormenaren Kabia dagoeneko prest dago denetariko proposamenak biltzen hasteko.
Izena emateko epea 2024ko ekainaren 1etik uztailaren 1era egongo da zabalik, bi egunak barne. Epaimahaiaren erabakiaren berri emango zaie hautagaie emailez uztaila amaitu aurretik.
