Alkizan natura gure egunerokoaren parte da. Basoak, mendiak, bidezidorrak, errekak eta urtaro bakoitzarekin aldatzen diren paisaiak inguruan ditugu, eta askotan, hain gertukoak izanik, oharkabean pasatzen zaizkigu. Bada, inguratzen gaituen paisaia merezi bezala aintzat hartzeko, Oilategitik elkarteak “Alkiza eta natura” argazki-bilketa antolatu du.
Ekimenaren helburua ez da argazki ederrak biltzea bakarrik. Alkizako natura-ondarea hobeto ezagutzea, estimatzea eta zaintzea sustatu nahi dugu. Argazkilaritzak aukera paregabea eskaintzen digu eguneroko paisaiei lasaiago begiratzeko eta, bidean, xehetasun berriak aurkitzeko.
Gure ingurunea ezagutzea da hura zaintzeko lehen urratsa. Ez dugu maite ezagutzen ez duguna, eta horregatik da garrantzitsua naturari denbora eskaintzea. Basoak, mendiak, errekak, belardiak, landareak edo animaliak ez dira paisaiaren parte huts bat; gure ondare naturala dira, eta etorkizuneko belaunaldiei transmititu beharreko altxorra ere bai. Argazki batek une bat gordetzen du, baina baita gure ingurunearekiko dugun maitasuna ere.
Parte hartzea oso erraza izango da. Herritar bakoitzak argazki bakarra bidali ahal izango du oilategitik@gmail.com helbidera, eta horretarako azken eguna irailaren 30a izango da. Jasotako irudi guztiak Alkizako Udalaren webgunean argitaratuko dira.
Ez da behar argazkilari aditua izatea. Garrantzitsuena zure begirada partekatzea da: basoko bazter bat, mendi tontorretik ikusten den paisaia, errekaren ertzeko xehetasun bat edo urte sasoi jakin batek eskaintzen duen kolorea.
Beraz, hartu kamera edo mugikorra, atera pasiatzera eta gozatu naturaz. Animatu parte hartzera eta erakutsi, zure begien bidez, zer den zuretzat Alkiza eta natura.
Parte hartzeko
- Gaia: Alkiza eta natura
- Argazki kopurua: herritar bakoitzak argazki bakarra.
- Bidaltzeko helbidea: oilategitik@gmail.com
- Azken eguna: irailaren 30a.
